Noyabrın 22-də Göynük kənd mərkəzi istifadəyə verilmişdir.
Naxçıvan Muxtar Respublikası Ali Məclisinin Sədri Vasif Talıbov binada yerləşən təşkilatların fəaliyyəti və yaradılan şəraitlə maraqlanmışdır.
Məlumat verilmişdir ki, birmərtəbəli kənd mərkəzində inzibati ərazi dairəsi üzrə nümayəndəlik, bələdiyyə, rabitə evi, polis sahə və baytarlıq məntəqələri, kitabxana, Yeni Azərbaycan Partiyası ərazi ilk təşkilatı, arxiv, statistika otağı, klub və 26 yerlik zal yerləşir. Kitabxana fondunda 6587 kitab vardır. Rabitə evində 96 nömrə tutumlu yeni nəsil ATS quraşdırılmış, telekommunikasiya şəbəkəsi yaradılmış və ilk dəfə stasionar telefon rabitə xidməti istifadəyə verilmişdir.

Yeni Azərbaycan Partiyası ərazi ilk təşkilatının 58 üzvü vardır ki, onlardan da 17-si gənc, 26-sı isə qadındır. Ərazi ilk təşkilatının sədri Füzuli Məmmədov partiya üzvləri adından yaradılan şəraitə görə minnətdarlıq edərək demişdir: “Bu gün Göynük kəndi bayram əhvali-ruhiyyəsindədir. Ali Məclis Sədrinin gəlişi sakinlərin böyük sevincinə səbəb olmuş, həyata keçirilən geniş quruculuq işləri ruh yüksəkliyi yaratmışdır. Diqqət və qayğı sayəsində Göynük kəndi muxtar respublikanın müasir kəndlərindən birinə çevrilmişdir. Bütün sahələr üzrə yaradılan nümunəvi şərait insanların rahat yaşamasına xidmət edir. Həyata keçirilən quruculuq işlərindən bizim ilk partiya təşkilatına da pay düşmüş, nümunəvi iş şəraiti yaradılmışdır. Bundan sonra da kəndimizin yaşıllaşdırılmasında və abadlaşdırılmasında partiya üzvləri daha böyük fəallıq göstərəcəklər”.

İnzibati ərazi dairəsi üzrə nümayəndə Yaqub Xudatov demişdir: “Bu gün kəndimiz kompleks şəkildə abadlaşdırılmışdır. Sovet hakimiyyəti illərində Göynükdə heç bir tikili inşa olunmamışdır. 2004-cü ildə Ali Məclis Sədrinin tapşırığı ilə kəndimizdə yeni məktəb binası tikilmiş, bir il sonra 7 kilometr məsafədən kəndimizə içməli su xətti çəkilmiş, ötən il həmin xətt 1 kilometrə yaxın uzadılmışdır. Bu gün Göynük kəndi üçün tarixi və əlamətdar bir gündür. Çünki Babək rayonunun ucqar dağ kəndi olan Göynük müasir görkəmə qovuşur. Kənd sakinləri, əsasən, əkinçilik, arıçılıq, heyvandarlıq və maldarlıqla məşğul olurlar. Dövlətimizin diqqət və qayğısı sayəsində ailə təsərrüfatları yaradılmış şəraitdən istifadə edərək məhsul istehsalını ilbəil artırırlar. İstehsal etdikləri məhsulların bazarlarda rahat satışını təşkil edərək dolanışıqlarını təmin edirlər. Biz də qurulanları qoruyacaq, göstərilən diqqət və qayğıya əməli işimizlə cavab verəcəyik”.
Ali Məclisin Sədri iclas zalında maarifləndirici tədbirlərin və görüşlərin keçirilməsi barədə tapşırıqlar vermişdir.
Bildirilmişdir ki, kənddə əsas diqqət yetirilən sahələrdən biri də baytarlıq işinin təşkilidir. Bu gün Babək rayonunda epizootik vəziyyət sabitdir. Bunun səbəbi dərman preparatları və digər tibbi avadanlıqlarla təminat, peyvəndləmə və dezinfeksiya tədbirlərinin vaxtında görülməsidir. Aparılan profilaktik tədbirlərin nəticəsidir ki, rayonda bu sahədə heç bir xəstəlik müşahidə olunmur.

Kəndlərdə müasir səhiyyə müəssisələrinin tikilməsi insan amilinə verilən yüksək qiymətin əyani göstəricisidir. Kənd mərkəzində yerləşən feldşer-mama məntəqəsində məntəqə müdiri və manipulyasiya otaqları vardır. Məntəqə ginekoloji müayinə masası və alət dəsti, təcili yardım çantası, qlükometr, boyölçən, tərəzi, soyuducu və ehtiyac olan digər köməkçi tibbi ləvazimatlarla təmin edilmişdir.
Ali Məclisin Sədri peyvənd və patronaj işinin təşkili, eləcə də səhiyyə maarifinə üstünlük verilməsi, gigiyenik qaydalara əməl olunması barədə tapşırıqlar vermişdir.
Sonra sakinlərlə görüş olmuşdur.
Naxçıvan Muxtar Respublikası Ali Məclisinin Sədri Vasif Talıbov sakinləri təbrik edərək demişdir: 2004-cü ildə ilk dəfə kənddə məktəb binası tikilib istifadəyə verildi, inzibati ərazi dairəsi üzrə nümayəndəlik yaradıldı. 2014-cü ildə Göynük kənd inzibati ərazi dairəsi Culfa rayonunun tabeliyindən çıxarılaraq Babək rayonunun tabeliyinə verildi, kəndin inkişafı üçün lazım olan bütün işlər həyata keçirildi.
Ali Məclisin Sədri demişdir: Göynük kəndinin eramızdan əvvəl başlayan qədim tarixi vardır. Kənd tarixi karvan yolu üzərində yerləşmiş, zaman-zaman göynüklülər digər bölgələrə köçərək məskunlaşmışlar. Hazırda Türkiyə ərazisində 3 yerdə, Azərbaycanda isə Şəki rayonunda Göynük adlı yaşayış məntəqəsi vardır. Ehtimal olunur ki, onlar da buradan vaxtilə karvan yolu ilə gedib o yerlərdə məskunlaşan sakinlərdir. Göynük səfalı və geniş imkanlara malik olan kənddir. Bu gün həm bələdiyyə və dövlət, həm də şəxsi mülkiyyətdə olan torpaqlar imkan verir ki, kəndin inkişafı bundan sonra da təmin olunsun. Göynükdə, əsasən, heyvandarlıq və maldarlıq inkişaf edib, məskunlaşma artıb, yeni evlər tikilib. Bu da inkişafın göstəricisidir. Yaradılan şəraitdən sonra məskunlaşma daha da artacaq və ərazidən səmərəli istifadə olunacaq, maldarlıq, heyvandarlıq, arıçılıq, meyvəçilik, bitkiçilik inkişaf etdiriləcəkdir. Bunun üçün isə lazım olan hər bir şərait var. Sakinlərin rayon mərkəzinə, Naxçıvan şəhərinə gediş-gəlişinin rahat olması üçün yol da abadlaşdırılıb. Yolda işlər hələ davam etdiriləcək. Bütün bunlar insanların rahat yaşaması üçündür. Kənd tamamilə qazlaşdırılıb, daimi elektrik enerjisi ilə təmin olunub, rabitə, internet, poçt və tibb xidməti yaradılıb.
Ali Məclisin Sədri görülən işlər münasibətilə sakinləri təbrik etmiş və əminliyini bildirmişdir ki, kənd bundan sonra da abadlaşacaq, məskunlaşma artacaqdır.
Göynük kənd sakinləri adından minnətdarlıq edən Təmleyxa İsayev demişdir: “Kəndimizdə fəaliyyət göstərən dövlət orqanları əvvəllər şəraiti olmayan vəziyyətdə əhaliyə xidmət göstərirdilər. Ali Məclis Sədrinin qayğısı ilə burada böyük quruculuq işləri görülmüşdür. Bu gün müasirtipli məktəb, kənd və xidmət mərkəzləri kənd sakinlərinin istifadəsinə verilir. Artıq hər bir şəraiti olan kənd mərkəzində həm inzibati ərazi dairəsi üzrə nümayəndəlik, həm də digər təşkilatlar əhaliyə yüksək səviyyədə xidmət göstərəcəklər. Məktəbdə tədrisin müasir tələblər səviyyəsində qurulması üçün hər cür şərait yaradılmışdır. Vaxtilə kəndimizdə əhalinin zəruri ehtiyaclarının ödənilməsi üçün heç bir şərait olmadığından kənd sakinləri qonşu kəndlərə və yaxud Naxçıvan şəhərinə getməli olurdular. Lakin bu gün istifadəmizə verilən müasir xidmət mərkəzi əhalinin zəruri ehtiyaclarının ödənilməsini tam təmin edəcəkdir. Kəndimizdə müasir poçt-rabitə və internet xidmətlərinin göstərilməsi üçün hərtərəfli şərait yaradılmışdır. Yollarımız asfaltlanmış, körpü tikilmiş, kənddə müasirtipli ATS quraşdırılmış, əhali fasiləsiz elektrik enerjisi, təbii qaz və internetlə təmin olunmuşdur. Kəndimizin istər suvarma, istərsə də içməli su təminatı öz həllini tapmışdır. Görülən işlər sakinlərin rahatlığına və yaxşı yaşamasına xidmət edir”.

* * *

Göynük kəndində yeni sosial obyektlər tikilərkən bir sıra abadlıq işləri də görülmüşdür. Kənddə 2480 metr yeni fiber-optik, 650 metr yeraltı kabel, 1280 metr hava rabitə xətti çəkilmiş, 55 rabitə dirəyi basdırılmışdır. Həmçinin elektrik təsərrüfatı tamamilə yenilənmiş, 2076 metr məsafədə məftil naqillər kabel xətti ilə əvəz edilmiş, 1200 metr hava elektrik verilişi xətti çəkilmişdir. Bundan başqa, 340 poqonometr polietilen borularla yeni tikililərə qaz xətti çəkilmiş, 11 min poqonometr qaz xəttində təmir-bərpa işləri aparılmışdır.