1992-ci il noyabrın 21-də ümummilli liderimiz Heydər Əliyevin rəhbərliyi ilə Naxçıvan Muxtar Respublikasında yaradılan Yeni Azərbaycan Partiyası müstəqil dövlətçilik tariximizin əsasını qoymuşdur. Bu gün ölkə Prezidenti cənab İlham Əliyevin rəhbərliyi ilə Yeni Azərbaycan Partiyası dövlət müstəqilliyimizin möhkəmləndirilməsində, ictimai-siyasi sabitliyin, milli həmrəyliyin, güclü və sosialyönümlü iqtisadiyyatın formalaşmasında başlıca siyasi qüvvəyə çevrilmişdir. Ölkəmizdə, eləcə də muxtar respublikada aparılan genişmiqyaslı quruculuq işləri, iqtisadiyyatın inkişafı və əhalinin rifahının yaxşılaşdırılması Yeni Azərbaycan Partiyasının proqramında nəzərdə tutulan tədbirlərin uğurlu icrasının nəticəsidir.
Noyabrın 21-də – Yeni Azərbaycan Partiyasının yaradılmasının 27-ci ildönümündə Şahbuz rayonunun Türkeş kəndində yeni sosial obyektlər istifadəyə verilmişdir.
Türkeş kənd tam orta məktəbinin yeni binasının açılışı olub
Noyabrın 21-də Türkeş kənd tam orta məktəbinin yeni binası istifadəyə verilmişdir.
Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsmişdir.
Məlumat verilmişdir ki, ikimərtəbəli məktəbdə 12 sinif otağı, kimya-biologiya və fizika laboratoriyaları, hərbi kabinə, şahmat sinfi, 2 elektron lövhə, kompüter, müəllimlər və psixoloq otaqları, kitabxana və idman zalı istifadəyə verilmişdir. Məktəbin kitabxana fondunda 1549 kitab vardır. Burada “Oxunması zəruri olan kitablar”dan ibarət guşə yaradılmışdır. Laboratoriyalarda lazımi təcrübə avadanlıqları qoyulmuş, idman zalında, hərbi kabinədə və sinif otaqlarında müasir tədris şəraiti yaradılmışdır. Məktəbdə 8 kompüter quraşdırılmış və internetə qoşulmuşdur.
Elektron lövhəli sinifdə muxtar respublikanın 200-dən artıq məktəbi ilə Heydər Əliyev Muzeyi arasında “Ümummilli lider Heydər Əliyev və Yeni Azərbaycan Partiyası” mövzusunda keçirilən interaktiv dərs izlənilmişdir.
Məktəbin müəllimi Əli Novruzov yaradılan şəraitə görə minnətdarlıq etmişdir.
Ali Məclisin Sədri məktəbin pedaqoji kollektivi ilə görüşmüşdür.
Türkeş kənd tam orta məktəbinin direktoru Bəxtiyar Tarverdiyev çıxış edərək demişdir ki, muxtar respublikanın digər rayonları kimi, Şahbuz rayonunun da qəsəbə və kəndləri günü-gündən abadlaşır və inkişaf edir. Bunun parlaq nümunələrindən biri də məhz bu gün açılışına toplaşdığımız Türkeş kənd tam orta məktəbidir. Yaradılan şərait məktəbdə tədrisin səviyyəsinin artmasına, yüksək nəticələrin əldə olunmasına, bilikli və vətənpərvər gənclərin yetişdirilməsinə imkan verəcəkdir.Bəxtiyar Tarverdiyev təhsilə göstərdiyi hərtərəfli diqqət və qayğıya görə məktəbin kollektivi adından Ali Məclisin Sədrinə minnətdarlığını bildirmişdir.
Məktəbin müəllimi Yeganə İbrahimova minnətdarlıq edərək demişdir: “Muxtar respublikanın inkişafında təhsil quruculuğu xüsusi yer tutur. Aparılan kompleks quruculuq işlərinin tərkib hissəsi kimi Türkeş kəndində məktəbin tikilməsi bunu bir daha təsdiq edir. Artıq şagirdlərimiz ən müasir təhsil şəraitinə malik məktəbdə təhsil alacaqlar. Bundan böyük diqqət və qayğı ola bilməz. Yaradılan şərait təhsil işçiləri qarşısında mühüm vəzifələr qoyur və məsuliyyətimizi daha da artırır. Söz veririk ki, müasir tədris şəraitindən səmərəli istifadə edəcək, şagirdlərin təhsilli, vətənpərvər və ölkəmizə layiq vətəndaşlar kimi yetişməsi qayğısına qalacağıq”.
Naxçıvan Muxtar Respublikası Ali Məclisinin Sədri Vasif Talıbov Türkeş kənd tam orta məktəbinin istifadəyə verilməsi münasibətilə kollektivi təbrik edərək demişdir: Bu gün Türkeş kəndinin həyatında əlamətdar gündür. Aparılan tikinti işlərindən sonra kənddə məktəb, kənd və xidmət mərkəzləri, yol sakinlərin istifadəsinə verilir. Ümummilli liderimiz Heydər Əliyev deyirdi ki, “Dövlət haradan olursa olsun, nədən olursa olsun kəsib məktəb işinə sərf etməli, müəllim əməyinə qiymət verməlidir”. Türkeş kəndində görülən işlər, müasir məktəb binasının tikilməsi də dövlət vəsaiti hesabına həyata keçirilmişdir. Həmçinin müəllim əməyi də qiymətləndirilmiş, məktəbin müəllimlərindən biri Azərbaycan Respublikasının “Əməkdar müəllim”i fəxri adına layiq görülmüşdür. Bu günə qədər lazımi tədris şəraiti olmayan binada fəaliyyət göstərməsinə baxmayaraq məktəbdə müəllim fədakarlığı və şagird çalışqanlığı nəticəsində nailiyyətlər qazanılmışdır.
Ali Məclisin Sədri kollektivə təşəkkür edərək demişdir: Türkeş kənd tam orta məktəbinin yeni binası müasir tədrisin tələbləri səviyyəsindədir. Ona görə də məktəbin müəllimləri öz üzərlərində işləməli, yeni innovasiyaları mənimsəməli, onları şagirdlərə öyrətməli, tədris müasir tələblər səviyyəsində qurulmalıdır. Sevindirici haldır ki, məktəbdə bütün fənlər üzrə müəllimlər fəaliyyət göstərir. Son 5 ildə məktəbin məzunlarının ali məktəblərə qəbul olunması həm də müəllimlərin hazırlıq səviyyəsinin göstəricisidir.
Ali Məclisin Sədri yaradılan şəraitdən səmərəli istifadə olunacağına və nailiyyətlərin daha da artacağına əminliyini bildirmiş, kollektivə tədrisdə uğurlar arzulamışdır.
Məktəbin həyətində bufet və fərdi qazanxana tikilmiş, açıq idman qurğuları quraşdırılmış, yaşıllıq salınmış, müasir suvarma və işıqlandırma sistemi çəkilmişdir.
